Dijalektujra ane rromani čhib

Rromani čhib iklistah andar o indijsko čibalano kašh. Iklistah andar o prakrit, katar e maškaruni faza inijsko čibahki, kaj džal andar o sanskrito.

Ku čhiba katar e šilali rig andar ka hindu čibenge hi majpaše e romane čibahke kaj delpe vorba adjive.

Ane ka 15 vijekujra romane dijasporahke, e čhib djelah sah po svijeto, te kulehke hi but pharete malaveh phuv ane savi inaj roma ili lengi čhib.. čhib te phere kaj živin paše roma, ćerd sig pe romani čhib, gija but kaj tode e alava ane lehghi čhib. E roma kaj den vorba romaneh ni kaptinp pe sah maškar pen. Sah e dijalektujra hi len sig katar e čhiba kahtar hi von a i e bršenca mućisalje te kuva muklah pe bilačhe pe lenghi čhib. Hi majbut katar e 50 različiti dijalektujra ano svijeto. Jek katar e majpindžarde dijalektujra hi arilje, lovajra, sinti, kalderašujra kale… dijalektujra hi gija drugačiji maškarape kaj jekhe ane nesavi našti kaptimpe. Romani čhib delpe vorba ane but puvja ano svijeto a samo ane evropa hi len oko 10 milionujra.

Majbut roma del vorba jek katar e varijanta e romane čibahke. Kana hi ćerdi e analiza e romane čibahke voj muthadah kaj hi voj paše e indo-evropahke čibange kaj denpe vorba ane šilale djelujra e indijahke te pakistanohke-pendžabo. Kava hi bitno te maladol o greografsko porijeklo e rromengo, kulehke kaj e pozajmime alava ano romano muthaven sar djele te dži kaj resle. E amari fizionomija te amari grupa e ratehki muthavel gaći sam pashe e šilale indijahke kastengo. E adjivesni lingvistika maladah e romani čhib kaj hi slično e čhibaha katar o pendžab ipotoharsko čhibaha, kaj den vorba ane šilale djelura e indijaha te ano pakistano. Kuva tovel e rromani čhib ane grupa maškaruneindijahke čhiba, ane kaj peren i e čhiba hindu,urdu te gasave, a jek studija kaj hi mukli ane lil nature muthavel kaj e rromani čhib hi povezime e sinhalsko čhib kaj delpe vorba pe šri lanka.

Veresave rroma hi len specifični kreolski te hamime čhiba maškaj kaj hi akala-

Kalo ili iberijski romani, kaj hi len romane alava te gramatika sar kaj hi ane špansko čhib-von ikhardon kale, a lenge alava hi hamime e špansko sleng te žargonujra.

Lomavrensko romano ili jermensko romano

Anglo romano ili englesko romani,

Romano grčko ili grčko romano čhib

Čergarsko romano ili norveško

Tavringersko romano ili šverdsko

Majpalune brš hi jek pokreto kaj vaćaren duj r kana škurin e rroma, kulehke kaj ane amari čhib hi amen jek r a hi amen alva kaj trubuj duj rr.